1 Samuel 26
1ⲛⲥⲓⲫⲁⲓⲟⲥ ⲇⲉ ⲁⲩⲉⲓ ⲉⲃⲟⲗ ϩⲙ ⲡⲕⲁϩ ⲉⲧⲣⲟⲕϩ ⲉⲣⲁⲧϥ ⲛⲥⲁⲟⲩⲗ ⲉⲡⲃⲟⲩⲛⲟⲥ ⲉⲩϫⲱ ⲙⲙⲟⲥ ⲛⲁϥ ϫⲉ ⲉⲓⲥ ⲇⲁⲇ ⲗⲏϫ ϩⲙ ⲡⲃⲟⲩⲛⲟⲥ ϩⲛ ⲭⲉⲇⲙⲁⲑ ⲡⲉⲧⲉⲙⲡⲙⲧⲟ ⲉⲃⲟⲗ ⲛⲓⲉⲥⲥⲁⲓⲙⲟⲩⲛ 2ⲥⲁⲟⲩⲗ ⲇⲉ ⲁϥⲧⲱⲟⲩⲛ ⲁϥⲓ ⲉϩⲣⲁⲓ ⲉⲧⲉⲣⲏⲙⲟⲥ ⲛⲥⲓⲫ ⲉⲣⲉϣⲟⲙⲛⲧ ⲛϣⲟ ⲛⲣⲱⲙⲉ ⲛⲙⲙⲁϥ ⲛⲥⲱⲧⲡ ⲉⲃⲟⲗ ϩⲙ ⲡⲓ︤ⲏ︦ⲗ︥ ⲉⲧⲣⲉϥⲕⲱⲧⲉ ⲛⲥⲁ ⲇⲁⲩⲉⲓⲇ ϩⲛ ⲧⲉⲣⲏⲙⲟⲥ ⲛⲥⲓⲫ 3ⲁⲩⲱ ⲥⲁⲟⲩⲗ ⲁϥⲧⲁⲁϥ ⲉϩⲣⲁⲓ ⲉⲡⲃⲟⲩⲛⲟⲥ ⲛⲭⲉⲗⲗⲁ ⲡⲉⲧⲉⲙⲡⲙⲧⲟ ⲉⲃⲟⲗ ⲛⲓⲉⲥⲥⲁⲓⲙⲟⲩⲛ ⲉϥϫⲓ ⲉϩⲣⲁⲓ ⲉⲧⲉϩⲓⲏ ⲇⲁⲩⲉⲓⲇ ⲇⲉ ⲛⲉϥϩⲙⲟⲟⲥ ⲉϩⲣⲁⲓ ϩⲛ ⲧⲉⲣⲏⲙⲟⲥ ⲁⲩⲱ ⲇ︤ⲁ︦ⲇ︥ ⲛⲧⲉⲣⲉϥⲛⲁⲩ ϫⲉ ⲥⲁⲟⲩⲗ ⲁϥⲓ ⲉϩⲣⲁⲓ ⲉϫⲱϥ ϩⲛ ⲧⲉⲣⲏⲙⲟⲥ 4ⲁⲇ︤ⲁ︦ⲇ︥ ϫⲟⲟⲩ ⲛϩⲉⲛⲕⲁⲧⲁⲥⲕⲟⲡⲟⲥ ⲁϥⲉⲓⲙⲉ ϫⲉ ⲥⲁⲟⲩⲗ ⲁϥⲓ ⲉⲃⲟⲗ ϩⲛ ⲕⲉⲉⲓⲗⲁ ⲉϥⲥⲃⲧⲱⲧ 5ⲇⲁⲩⲉⲓⲇ ⲁϥⲧⲱⲟⲩⲛ ⲙⲡⲁⲧⲉⲗⲁⲁⲩ ⲉⲓⲙⲉ ⲁϥⲟⲛϣϥ ⲉϩⲟⲩⲛ ⲉⲡⲙⲁ ⲉⲧⲉⲣⲉⲥⲁⲟⲩⲗ ⲛϩⲏⲧϥ ⲉϥⲛⲕⲟⲧⲕ ⲁⲩⲱ ⲛⲉϥⲉⲙⲙⲁⲩ ⲛϭⲓ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡⲉⲧϩⲓϫⲙⲡⲉϥⲙⲏⲏϣⲉ ⲥⲁⲟⲩⲗ ⲇⲉ ⲛⲉϥⲉⲛⲕⲟⲧⲕ ϩⲛ ⲧⲁⲛⲡⲏⲛⲏ ⲁⲩⲱ ⲡⲗⲁⲟⲥ ⲛⲉϥⲡⲟⲣϣ ⲉⲃⲟⲗ ϩⲙ ⲡⲉϥⲕⲱⲧⲉ 6ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲭⲓⲙⲉⲗⲉⲭ ⲡⲉⲭⲉⲧⲧⲁⲓⲟⲥ ⲁⲩⲱ ⲁⲃⲓⲥⲥⲁ ⲡϣⲏⲣⲉ ⲛⲥⲁⲣⲟⲩⲓⲁⲥ ⲡⲥⲟⲛ ⲛⲓⲱⲁⲃ ⲉϥϫⲱ ⲙⲙⲟⲥ ⲛⲁⲩ ϫⲉ ⲛⲓⲙ ⲡⲉⲧⲛⲁⲉⲓ ⲛⲙⲙⲁⲓ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲉⲣⲁⲧϥ ⲛⲥⲁⲟⲩⲗ ⲡⲉϫⲉⲁⲃⲉⲥⲥⲁ ⲛⲁϥ ϫⲉ ⲁⲛⲟⲕ ϯⲛⲏⲩ ⲛⲙⲙⲁⲕ 7ⲁⲩⲱ ⲇⲁⲩⲉⲓⲇ ⲙⲛ ⲁⲃⲉⲥⲥⲁ ⲁⲩϫⲱⲧⲉ ⲉϩⲟⲩⲛ ⲉⲡⲗⲁⲟⲥ ⲛⲧⲉⲩϣⲏ ⲁⲩⲱ ⲉⲓⲥ ⲥⲁⲟⲩⲗ ⲉϥⲛⲏϫ ⲉϥⲟⲃϣ ϩⲛ ⲗⲁⲙⲡⲏⲛⲏ ⲉⲣⲉⲧⲉϥⲗⲟⲅⲭⲏ ⲧⲣⲧⲱⲣ ϩⲙ ⲡⲕⲁϩ ϩⲁϫⲱϥ ⲁⲩⲱ ⲁⲃⲉⲛⲛⲏⲣ ⲙⲛ ⲡⲉϥⲗⲁⲟⲥ ⲉⲩⲛⲏϫ ⲉⲩⲟⲃϣ ϩⲙ ⲡⲉϥⲕⲱⲧⲉ 8ⲡⲉϫⲉⲁⲃⲉⲥⲥⲁ ⲉϩⲟⲩⲛ ϩⲛ ⲇⲁⲩⲉⲓⲇ ϫⲉ ⲁⲡϫⲟⲉⲓⲥ ϯ ⲙⲡⲉⲕϫⲁϫⲉ ⲉϩⲣⲁⲓ ⲉⲧⲟⲟⲧⲕ ⲙⲡⲟⲟⲩ ⲧⲉⲛⲟⲩ ϭⲉ ϯⲛⲁⲃⲱⲕ ⲛⲧⲁⲣⲁϩⲧϥ ϩⲛ ⲧⲁⲗⲟⲅⲭⲏ ⲛⲧⲁϫⲟⲧϥ ⲉⲡⲕⲁϩ ⲛⲧⲁⲧⲣⲉ ⲟⲩⲥⲟⲡ ⲛⲟⲩⲱⲧ ⲣⲁϣⲧϥ 9ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲛ ⲁⲃⲉⲥⲥⲁ ϫⲉ ⲙⲡⲉⲣⲙⲟⲟⲩⲧϥ ϫⲉ ⲛⲓⲙ ⲡⲉⲧⲛⲁⲉⲛⲧⲟⲟⲧϥ ⲉϫⲙ ⲡⲉⲭ︤ⲣ︦ⲥ︥ ⲙⲡϫⲟⲉⲓⲥ ⲛϥⲟⲩϫⲁⲓ 10ⲡⲉϫⲉⲇⲁⲩⲉⲓⲇ ⲟⲛ ϫⲉ ⲡϫⲟⲉⲓⲥ ⲟⲛϩ ϫⲉ ⲉⲣⲉⲧⲙ ⲡϫⲟⲉⲓⲥ ϯⲥⲃⲱ ⲛⲁϥ ⲡⲉϥϩⲟⲟⲩ ⲛⲁⲉⲓ ⲛϥⲙⲟⲩ ⲏ ⲛϥⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲛⲥⲉⲣⲁϩⲧϥ ⲙⲛ ⲛⲉⲛⲕⲟⲟⲩⲉ 11ⲁⲛⲟⲕ ⲇⲉ ⲛⲛⲉⲡⲁⲓ ϣⲱⲡⲉ ⲙⲙⲟⲓ ⲛⲧⲟⲟⲧϥ ⲙⲡϫⲟⲉⲓⲥ ⲉⲧⲣⲁⲉⲛⲧⲟⲟⲧ ⲉϫⲙ ⲡⲉⲭⲥ ⲙⲡϫⲟⲉⲓⲥ ⲧⲉⲛⲟⲩ ϭⲉ ϥⲓ ⲛⲧⲗⲟⲅⲭⲏ ⲉⲧϩⲁϫⲱϥ ⲁⲩⲱ ⲡⲉϩⲛⲁⲁⲁⲩ ⲙⲙⲟⲟⲩ ⲛⲧⲉⲛⲃⲱⲕ ⲉϩⲣⲁⲓ ⲉⲡⲉⲛⲙⲁ 12ⲁⲩⲱ ⲇⲁⲩⲉⲓⲇ ⲛⲧⲉⲣⲉϥϥⲓ ⲛⲧⲉϥⲗⲟⲅⲭⲏ ⲙⲛ ⲡⲉϩⲛⲁⲁⲩ ⲙⲙⲟⲟⲩ ⲉⲧϩⲁϫⲱϥ ⲁⲩⲧⲱⲟⲩⲛ ⲁⲩⲙⲟⲟϣⲉ ⲛⲉⲙⲛⲗⲁⲁⲩ ⲇⲉ ⲓⲱⲣϩ ⲙⲙⲟⲟⲩ ⲡⲉ ⲁⲩⲱ ⲛⲉⲙⲡⲉ ⲗⲁⲁⲩ ⲉⲓⲙⲉ ⲏ ⲁϥⲛⲉϩⲥⲉ ⲁⲗⲗⲁ ⲛⲉⲩⲟⲃϣ ⲧⲏⲣⲟⲩ ⲡⲉ ⲉⲃⲟⲗ ϫⲉ ⲟⲩϩⲟⲧⲉ ⲛⲧⲉ ⲡϫⲟⲉⲓⲥ ⲁⲥⲉⲓ ⲉϩⲣⲁⲓ ⲉϫⲱⲟⲩ 13ⲇⲁⲩⲉⲓⲇ ⲇⲉ ⲁϥⲟⲩⲱⲧⲃ ⲉⲡⲓⲥⲁ ⲙⲙⲟⲟⲩ ⲁϥⲁϩⲉⲣⲁⲧϥ ⲉϫⲛ ⲧⲁⲡⲉ ⲙⲡⲧⲟⲟⲩ ⲉⲛⲁϣⲉ ⲧⲉϩⲓⲏ ⲉⲧⲟⲩⲧⲱⲟⲩ 14ⲁⲩⲱ ⲇⲁⲩⲉⲓⲇ ⲁϥⲱϣ ⲉⲃⲟⲗ ⲉⲡⲗⲁⲟⲥ ⲁⲩⲱ ⲁϥϣⲁϫⲉ ⲙⲛ ⲁⲃⲉⲛⲛⲏⲣ ⲉϥϫⲱ ⲙⲙⲟⲥ ⲛⲁϥ ϫⲉ ⲛⲅⲛⲁⲉⲣⲕⲟⲩⲱ ⲁⲛ ϩⲁⲣⲱⲓ ⲁⲃⲉⲛⲛⲏⲣ ⲁⲩⲱ ⲁⲃⲉⲛⲛⲏⲣ ⲁϥⲉⲣⲟⲩⲱ ⲉϥϫⲱ ⲙⲙⲟⲥ ϫⲉ ⲛⲧⲕ ⲛⲓⲙ ⲛⲧⲟⲕ ⲡⲉⲧⲙⲟⲩⲧⲉ ⲟⲩⲃⲏⲓ 15ⲡⲉϫⲉⲇ︤ⲁ︦ⲇ︥ ⲛⲁⲃⲉⲛⲛⲏⲣ ϫⲉ ⲙⲏ ⲛⲧⲕ ⲟⲩⲣⲱⲙⲉ ⲁⲛ ⲛⲇⲩⲛⲁⲧⲟⲥ ⲛⲧⲟⲕ ⲏ ⲛⲓⲙ ⲡⲉ ⲡⲕⲉⲟⲩⲁ ⲛⲧⲉⲕϩⲉ ϩⲙ ⲡⲓ︤ⲏ︦ⲗ︥ ⲉⲧⲃⲉ ⲟⲩ ϭⲉ ⲛⲅⲣⲟⲉⲓⲥ ⲁⲛ ⲉⲡⲉⲕϫⲟⲉⲓⲥ ⲡⲣⲣⲟ ϫⲉ ⲁⲟⲩⲁ ⲉⲃⲟⲗ ϩⲙ ⲡⲁⲗⲁⲟⲥ ϫⲱⲧⲉ ⲉϩⲟⲩⲛ ⲉⲙⲟⲩⲟⲩⲧ ⲙⲡⲉⲕϫⲟⲉⲓⲥ ⲡⲣⲣⲟ 16ⲁⲩⲱ ⲛⲛⲁⲛⲟⲩ ⲡⲉⲓϣⲁϫⲉ ⲁⲛ ⲛⲧⲁⲕⲁⲁϥ ⲡϫⲟⲉⲓⲥ ⲟⲛϩ ϫⲉ ⲛⲧⲉⲧⲛ ϩⲉⲛⲣⲱⲙⲉ ⲉⲩⲙⲡϣⲁ ⲙⲡⲙⲟⲩ ⲉⲛⲧⲉⲧⲛⲣⲟⲉⲓⲥ ⲁⲛ ⲉⲡⲉⲧⲛϫⲟⲉⲓⲥ ⲡⲣⲣⲟ ⲉⲡⲉⲭⲥ ⲡⲉ ⲙⲡϫⲟⲉⲓⲥ ⲧⲉⲛⲟⲩ ϭⲉ ϯϩⲧⲏⲕ ⲛⲅⲛⲁⲩ ϫⲉ ⲉⲣⲉⲧⲗⲟⲅⲭⲏ ⲙⲡⲣⲣⲟ ⲛⲧⲱⲛ ⲁⲩⲱ ⲡⲉϩⲛⲁⲁⲩ ⲙⲙⲟⲟⲩ ⲉⲧⲕⲏ ϩⲁϫⲱϥ 17ⲥⲁⲟⲩⲗ ⲇⲉ ⲁϥⲥⲟⲩⲉⲛⲧⲉⲥⲙⲏ ⲛⲇⲁⲩⲉⲓⲇ ⲡⲉϫⲁϥ ϫⲉ ⲧⲉⲕⲥⲙⲏ ⲧⲉ ⲧⲁⲓ ⲡⲁϣⲏⲣⲉ ⲇⲁⲩⲉⲓⲇ ⲡⲉϫⲉⲇⲁⲩⲉⲓⲇ ϫⲉ ⲁⲛⲟⲕ ⲡⲉⲕϩⲙϩⲁⲗ ⲁⲛⲟⲕ ⲡⲉ ⲡⲁϫⲟⲉⲓⲥ ⲡⲣⲣⲟ 18ⲡⲉϫⲁϥ ⲟⲛ ϫⲉ ⲉⲧⲃⲉ ⲟⲩ ⲡⲁϫⲟⲉⲓⲥ ⲡⲏⲧ ϩⲓⲛⲁⲓ ⲛⲥⲁ ⲡⲉϥϩⲙϩⲁⲗ ⲉⲧⲃⲉ ⲟⲩ ϫⲉ ⲛⲧⲁⲓⲣⲛⲟⲃⲉ ⲁⲩⲱ ⲟⲩ ⲡⲉ ⲡⲁϫⲓⲛϭⲟⲛⲥ ⲛⲧⲁⲩϩⲉ ⲉⲣⲟϥ ⲉϩⲟⲩⲛ ⲉⲣⲟⲓ ⲏ ⲁϣ ⲧⲉ ⲧⲕⲁⲕⲓⲁ 19ⲧⲉⲛⲟⲩ ϭⲉ ⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲥⲱⲧⲙ ⲉⲛⲉϣⲁϫⲉ ⲙⲡⲉϥϩⲙϩⲁⲗ ϫⲉ ⲉϣⲱⲡⲉ ⲙⲉⲛ ⲡⲛⲟⲩⲧⲉ ⲡⲉⲧⲧⲟⲩⲛⲟⲥ ⲙⲙⲟⲕ ⲉϩⲣⲁⲓ ⲉϫⲱⲓ ⲉϥⲉϣⲱⲗⲙ ⲉⲧⲉⲕⲑⲩⲥⲓⲁ ⲉⲩⲥϯⲛⲟⲩⲃⲉ ⲉϣⲱⲡⲉ ⲇⲉ ϩⲛϣⲏⲣⲉ ⲛⲣⲱⲙⲉ ⲛⲉ ⲉⲧⲉⲓⲣⲉ ⲛⲛⲁⲓ ⲉⲣⲉⲛⲉⲓⲕⲟⲟⲩⲉ ϣⲱⲡⲉ ⲉⲩⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉ ⲁⲩⲛⲟϫⲧ ⲉⲃⲟⲗ ⲙⲡⲟⲟⲩ ⲉⲧⲉⲙⲕⲁⲁⲧ ⲉⲥⲙⲛⲧ ϩⲛ ⲛⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ ⲉⲩϫⲱ ⲙⲙⲟⲥ ⲛⲁⲓ ϫⲉ ⲃⲱⲕ ⲁⲣⲓϩⲙϩⲁⲗ ⲛϩⲉⲛⲕⲉⲛⲟⲩⲧⲉ 20ⲧⲉⲛⲟⲩ ϭⲉ ⲛⲛⲉⲡⲁⲥⲛⲟϥ ⲡⲱⲛ ⲉⲃⲟⲗ ϩⲓϫⲙ ⲡⲕⲁϩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉ ⲁϥⲕⲁⲣⲁⲧϥ ⲉⲃⲟⲗ ⲛϭⲓ ⲡⲣⲣⲟ ⲙⲡⲓ︤ⲏ︦ⲗ︥ ⲉⲕⲱⲧⲉ ⲛⲥⲁ ⲧⲁⲯⲩⲭⲏ ⲉⲓⲟ ⲛⲑⲉ ⲛⲟⲩⲡⲏⲓ ⲛⲟⲩⲱⲧ ⲕⲁⲧⲁ ⲑⲉ ⲉⲧⲉⲣⲉⲡⲃⲁⲓ ϯⲟⲩⲟⲓ ϩⲛ ⲛⲉⲛⲧⲟⲩⲉⲓⲏ 21ⲡⲉϫⲉⲥⲁⲟⲩⲗ ⲛⲁϥ ϫⲉ ⲁⲓⲣⲛⲟⲃⲉ ⲃⲱⲕ ⲡⲁϣⲏⲣⲉ ⲇⲁⲩⲉⲓⲇ ϫⲉ ⲛϯⲛⲁϣⲣⲡⲉⲑⲟⲟⲩ ⲛⲁⲕ ⲁⲛ ϫⲉ ⲧⲁⲯⲩⲭⲏ ⲧⲁⲓⲏⲩ ⲛⲁϩⲣⲁⲕ ϩⲙ ⲡⲟⲟⲩ ⲛϩⲟⲟⲩ ⲁⲓϣⲱⲡⲉ ⲉⲩⲗⲁⲁⲩ ⲁⲩⲱ ⲁⲓϣⲱⲡⲉ ⲉⲙⲁⲧⲉ ϩⲛ ϩⲛⲛⲟϭ ⲙⲙⲛⲧⲁⲧⲥⲟⲟⲩⲛ 22ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ϫⲉ ⲉⲓⲥ ⲧⲗⲟⲅⲭⲏ ⲙⲡⲣⲣⲟ ϩⲙ ⲡⲉⲓⲙⲁ ⲙⲁⲣⲉⲟⲩⲁ ϩⲛ ⲛⲉⲕϩⲙϩⲁⲗ ⲉⲓ ⲛϥϫⲓⲧⲥ 23ⲁⲩⲱ ⲡϫⲟⲉⲓⲥ ⲉϥⲉⲕⲧⲟ ⲉϫⲙ ⲡⲟⲩⲁ ⲡⲟⲩⲁ ⲛⲧⲉϥⲇⲓⲕⲁⲓⲟⲥⲩⲛⲏ ⲙⲛ ⲧⲉϥⲡⲓⲥⲧⲓⲥ ⲛⲑⲉ ⲛⲧⲁⲡϫⲟⲉⲓⲥ ⲧⲁⲁⲕ ⲙⲡⲟⲟⲩ ⲉϩⲣⲁⲓ ⲉⲧⲟⲟⲧ ⲁⲩⲱ ⲙⲡⲓⲣϩⲛⲁⲓ ⲉⲉⲛⲧⲟⲟⲧ ⲉϫⲙ ⲡⲉⲭ︤ⲣ︦ⲥ︥ ⲙⲡϫⲟⲉⲓⲥ 24ⲁⲩⲱ ⲕⲁⲧⲁ ⲑⲉ ⲛⲧⲁⲧⲉⲕⲯⲩⲭⲏ ⲁⲓⲁⲓ ⲙⲡⲟⲟⲩ ⲛⲁϩⲣⲁⲓ ϩⲓⲛⲁⲓ ϩⲱ ⲉⲣⲉⲧⲁⲯⲩⲭⲏ ⲁⲓⲁⲓ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛϥⲥⲕⲉⲡⲁⲍⲉ ⲙⲙⲟⲓ ⲁⲩⲱ ⲛϥⲛⲁϩⲙⲉⲧ ⲉⲃⲟⲗ ϩⲛ ⲑⲗⲓⲯⲓⲥ ⲛⲓⲙ 25ⲡⲉϫⲉⲥⲁⲟⲩⲗ ⲛⲇ︤ⲁ︦ⲇ︥ ϫⲉ ⲕⲥⲙⲁⲙⲁⲁⲧ ⲛⲧⲟⲕ ⲡⲁϣⲏⲣⲉ ⲁⲩⲱ ϩⲛ ⲟⲩⲉⲓⲣⲉ ⲉⲕⲉⲉⲓⲣⲉ ⲛϩⲉⲛϭⲟⲙ ⲉⲕⲉϭⲙϭⲟⲙ ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉϩⲣⲁⲓ ⲉⲧⲉϥϩⲓⲏ ⲥⲁⲟⲩⲗ ϩⲱⲱϥ ⲁϥⲕⲧⲟϥ ⲉϩⲣⲁⲓ ⲉⲡⲉϥⲙⲁ
Copyright information for
CopSahBible2